అథాష్టాదశోऽధ్యాయః - 71 నుండి 79 శ్లోకాలు

అథాష్టాదశోऽధ్యాయః - మోక్షసంన్యాసయోగః 71 నుండి 79 శ్లోకాలు 

71
శ్రద్ధావాననసూయశ్చ శృణుయాదపి యో నరః|
సోऽపి ముక్తః శుభాఁల్లోకాన్ప్రాప్నుయాత్పుణ్యకర్మణామ్||

72
కచ్చిదేతచ్ఛ్రుతం పార్థ త్వయైకాగ్రేణ చేతసా|
కచ్చిదజ్ఞానసమ్మోహః ప్రనష్టస్తే ధనఞ్జయ||

73
అర్జున ఉవాచ|
నష్టో మోహః స్మృతిర్లబ్ధా త్వత్ప్రసాదాన్మయాచ్యుత|
స్థితోऽస్మి గతసన్దేహః కరిష్యే వచనం తవ||

74
సఞ్జయ ఉవాచ|
ఇత్యహం వాసుదేవస్య పార్థస్య చ మహాత్మనః|
సంవాదమిమమశ్రౌషమద్భుతం రోమహర్షణమ్||

75
వ్యాసప్రసాదాచ్ఛ్రుతవానేతద్గుహ్యమహం పరమ్|
యోగం యోగేశ్వరాత్కృష్ణాత్సాక్షాత్కథయతః స్వయమ్||

76
రాజన్సంస్మృత్య సంస్మృత్య సంవాదమిమమద్భుతమ్|
కేశవార్జునయోః పుణ్యం హృష్యామి చ ముహుర్ముహుః||

77
తచ్చ సంస్మృత్య సంస్మృత్య రూపమత్యద్భుతం హరేః|
విస్మయో మే మహాన్ రాజన్హృష్యామి చ పునః పునః||

78
యత్ర యోగేశ్వరః కృష్ణో యత్ర పార్థో ధనుర్ధరః|
తత్ర శ్రీర్విజయో భూతిర్ధ్రువా నీతిర్మతిర్మమ||

79
ఓం తత్సదితి శ్రీమద్భగవద్గీతాసూపనిషత్సు
బ్రహ్మవిద్యాయాం యోగశాస్త్రే శ్రీకృష్ణార్జునసంవాదే

మోక్షసంన్యాసయోగో నామ అష్టాదశోऽధ్యాయః||

ఓం

శాంతాకారం భుజగశయనం పద్మనాభం సురేశమ్|

విశ్వాధారం గగనసదృశం మేఘవర్ణం శుభాఙ్గమ్|

లక్ష్మీకాన్తం కమలనయనం యోగిభిర్ధ్యానగమ్యమ్|

వన్దే విష్ణుం భవభయహరం సర్వలోకైకనాథమ్||

సర్వేజనా సుఖినోభవంతు....... ఓం తత్ సత్